အဖြည့်ခံ

ငါ့ကို နင်သောက်နေကျ
ကျစိမ့်တစ်ခွက်လို သဘောထားပါ
နင်ခံတွင်းချဉ်လာတဲ့ အခါကျမှ
ငါ့ကိုလွမ်းပါ.....။

လျှပ်စစ်မီးရောင်တွေအောက်မှာ
သဘာဝကို ဆန့်ကျင်ပြီး စည်းဇိမ်ခံယူပါ
မီးပျက်တဲ့ ညမျိုးမှာမှ
လပြည့်ညကို သတိရပါ။

ပေတရာလမ်းပေါ် ဘီးလှိမ့်ပြီး
သီချင်းသံစဉ်တွေကို အပြည့်ဝခံစားပါ
ကျောက်စရစ်လမ်းပေါ် ခြေချတဲ့အခါကျမှ
ခုံဖိနပ်စုတ်တစ်ရံရဲ့ မာကျောမှုကို လေးစားပါ။

အသပြာတွေနဲ့ လောင်းကစားလုပ်ယူရတဲ့
ရယ်မောခြင်းတွေကို ချိတ်ဆွဲထားပါ
အခက်ခဲတောင်းကုန်းပေါ် တတ်ရတဲ့အခါကျမှ
လက်တွဲခေါ်ခံရတဲ့ ပီတိကိုမှတ်မိပါ။

သိပ္ပံတွေရဲ့ အအေးဓါတ်ကို ခိုလှုံပါ
ကန္တာရထဲရောက်တဲ့ အခါကျမှ
မိုးအေးအေးမှာ သောက်ရတဲ့
ကော်ဖီတစ်ခွက်ကို တောင့်တပါ။

ငါ့အတွက်တော့....
သုဘရာဇာရဲ့ ပေါက်တူးအောက်ရောက်မှ
မင်းကိုလွမ်းဖို့၊ ဖြည့်ဆည်းပေးဖို့ကို
အဆုံးသတ်ရလိမ့်မယ်....။